隔牆有耳：煲呔影雀公鏡私用

[鸠山由纪夫]

香港地咁細，高官真係要謹言慎行。好似煲呔咁，又有新搞作，今次唔係飲飲食食，而係有網上討論區圖文並茂踢爆煲呔上個禮拜去米埔影雀。煲呔係龍友係人都知，佢無論睇國慶閱兵或者東亞運足球決賽，都相機不離身，今次去影雀更加帶齊長短火專業裝備，但就被眼利嘅網民發現，佢用嘅一支鏡頭上面貼有政府新聞處個嘜頭，即刻惹來議論，質疑佢係咪公鏡私用。煲呔微服出巡幾乎次次都出事，所以今次去影雀都好低調，除咗老婆曾太之外，就只係帶咗司機同兩個保鑣，但就撞到個龍友，仲被拍下一舉一動，放埋上網。
出動觀鳥專家架生 放大圖片
煲呔用嚟影雀嘅鏡頭，貼住 GIS PHOTO SECTION，被網民質疑公鏡私用。
細心睇吓煲呔影雀嘅裝備，就知佢專業，其中一支鏡頭係觀鳥專家嘅專業架生，米埔啲保育專家都有用佢監察候鳥。但佢用嘅其中一支鏡，清楚見到貼住「 GISPHOTOSECTION」（政府新聞處攝影組）嘅膠貼，令人質疑佢係咪用公帑買嘅器材嚟發展個人興趣。咁嚴重嘅指控，八方梗係即刻向特首辦問個究竟，特首辦話，煲呔想寫一篇有關候鳥嘅網誌，目的係帶出保育訊息，所以順便影啲雀仔相，諗住上載喺網誌度，先同新聞處借批攝影器材，用完就立即歸還喎。


煲呔（右）最近熱衷做龍友，上個禮拜仲專程去米埔濕地影雀。